सर्वाधिक कमाउने खेलाडीको सूचीमा मेस्सीले रोनाल्डोलाई पछि पारे

सर्वाधिक कमाउने खेलाडीको सूचीमा मेस्सीले रोनाल्डोलाई पछि पारे

सन् २०१८ को सबैभन्दा धेरै कमाउने खेलाडीको सूचीमा बार्सिलोनाका अर्जेन्टाइन स्टार लियोनल मेस्सीले प्रतिद्वन्द्वी क्रिष्टियानो रोनाल्डोलाई पछि पारेका छन् ।

अमेरिकाबाट प्रकाशित हुने फोर्ब्स म्यागाजिनले आज सार्वजनिक गरेको रिपोर्ट अनुसार मेस्सीको यो बर्षको आम्दानी एघार करोड अमेरिकी डलर छ । यस अघिको दुई वर्ष धेरै कमाउने खेलाडीको शीर्ष स्थानमा रहेका रोनाल्डोको कमाइ भने १० करोड ८० लाख डलर छ ।

लियोनल मेस्सी धेरै कमाउने खेलाडीमा दोस्रो स्थान र रोनाल्डो तेस्रो स्थानमा रहँदा शीर्ष स्थानमा अमेरिकी बक्सर फ्लोइड मेवेदर छन् ।
यस वर्ष मिक्स मार्सल आर्टसका सुपरस्टार कोनोर म्याकग्रेगरसँगको फाइटमा जित हासिल गरेपछि उनको आम्दानी ह्वात्तै बढेर २८ करोड ५० लाख डलर पुगेको हो  ।

यसअघि सन् २०१५ मा पनि उनी फोर्ब्सको सूचिमा शीर्ष स्थानमा थिए । नौ करोड ९० लाख डलर कमाएका कोनोर म्याकग्रेगर चौथो स्थानमा छन् ।

ब्राजिलियन स्टार नेइमार पहिलो पटक शीर्ष १० भित्र पर्न सफल भएका छन् । गत सिजन बार्सिलोनाबाट कीर्तिमानी मूल्यमा पीएसजी गएका नेइमारको आम्दानी उल्लेख्य रुपमा बढेको छ । ६ करोड ७३ लाख डलर कमाएका नेइमार पाँचौं स्थानमा छन् । अमेरिकी बास्केटबल खेलाडी लिब्रन जेम्स छैटौं स्थानमा छन् भने टेनिस स्टार रोजर फेडेरर सातौं स्थानमा छन् ।

खेलमा खासै सफल नभए पनि विज्ञापनबाट उनले धेरै कमाएका छन् । खेलबाट १ करोड २२ लाख डलर कमाएका फेडररले विज्ञापनबाट यो वर्ष ६ करोड ५० लाख हात पारे ।

भारतीय क्रिकेट कप्तान विराट कोहली यो सूचीको ८३औं स्थानमा छन् । उनले तलबबाट ४० लाख तथा विज्ञापनबाट २ करोड कमाएका छन् ।पछिल्लो आठ वर्षमा पहिलो पटक महिला खेलाडी शीर्ष १०० भित्र पर्न सकेनन् ।

Source ujyaaloonline
Share