दिनदहाडै पेस्तोल देखाएर साढे १६ लाख रुपैयाँ लुटियो

दिनदहाडै पेस्तोल देखाएर साढे १६ लाख रुपैयाँ लुटियो

बर्दिबास: कन्चटमा पेस्तोल तेस्याएर   महोत्तरीको मनरा सिस्वा नगरपालिका– ६ जाउँख चोक नजिकैबाट १६ लाख ५२ हजार नगद लुटिएको छ  ।सरपल्लो  बजारमा सञ्चालित प्रभु मनी ट्रान्सफरका लागि जलेश्वरको बैंकबाट ल्याउँदै गरेको रकम अज्ञात समुहले लुटेर फरार भएको जिल्ला प्रहरी कार्यालय महोत्तरीका एसपी कुवेर कडायतले जनाए ।

ज ६ प ५७६४ नम्वरको मोटसाईकलमा आउँदै गर्दा प्रभु मनी ट्रान्सफरका कर्मचारी सञ्जीव साहको साथबाट दुईवटा मोटरसाइकलमा आएका चारजनाले रकम लुटेर भागेको प्रहरीले जनाएको छ । बर्दिबास–औरही–जलेश्वरको व्यस्त सडककै बीचबाट  दिनदहाडै रुकम लुटिएको हो ।

‘सञ्जीव सवार मोटरसाइकलाई माक्स लगाएरका लुटेराहरुले अगाडि र पछाडिबाट घेरा हाले । मोबाइल र मोटरसाइकलको साँचो खोसे,’ पीडितको भनाईलाई उधिृत गर्दै एसपी कडायतले भने,‘कन्चटमा पेस्तोल देखाए । रकम राखिएको कालो ब्याग खोसेर लुटेरा लुटेर भागे ।’

जलेश्वरस्थित प्रभु वैंकबाट २ लाख ५९ हजार र लक्ष्मी बैंकबाट १३ लाख ९३ हजार निकालेर प्रभु मनी ट्रान्सफरमा जाँदै गरेका साहको रकम लुटिएका थिए । लुटेराहरुले जलेश्वर–बर्दिवास सडकखण्ड अन्तर्गत पर्ने जाउँख चोक नजिक सुनसान ठाउँमा मोटरसाइकल रोक्न लगाई पेस्तोल तेस्र्याएर रकम लुटेर भागेका पीडितले प्रहरीलाई बताएका छन् ।

घटना मंगलबार साढे ३ बजेको भएपनि प्रहरीमा ढिलो खबर पुगेको थियो । प्रहरीले लुटाहरु पक्राउ नगरेको भन्दै बुधबार स्थानीयहरु ब्र्दिबास –औरही–जलेश्वर सडकखण्ड जाम गरेर प्रदर्शन गरेका छन् । लुटपाटको खबर पाए लगतै अपराधिहरुको खोजीका लागि त्यस क्षेत्रमा व्यापक प्रहरी परिचालन गरिएको एसपी कडायतले दाबी गरेका छन् ।

गत बैशाख  ८ गते गौशाला–रामनगर–माइस्थान सडक खण्डबाट पनि पेस्तोल देखाएर करीब ११ लाख लुटिएको थियो । बजारबाट कलेक्सन गरे गौशालाबाट बर्दिबास फर्किदैं गर्दा ज.१ त. ८९९ नम्बरको सवारीलाई जंगलमा रोकेर साँझको समयकमा दिलसा सप्लायर्स बर्दिबासको रकम लुटिएको थियो । तर, लुटेरा अझै पक्राउ पर्न सकेका छैनन् ।

Source annapurnapost

Share