‘सजिलो छैन दर्शक हँसाउन’

‘सजिलो छैन दर्शक हँसाउन’

काठमाडौं : मान्छे हँसाउने काम त्यति सजिलो छैन । मह जोडीले धेरै अन्तर्वार्तामा भनेका छन्, ‘हाँसिरहेको मान्छेलाई रुवाउन जति सजिलो छ, रोइरहेको मान्छेलाई हँसाउन त्यति नै गाह्रो ।’ त्यसैले पनि होला दर्शक हँसाउन हास्यकलाकारहरू अनेक उपाय निकाल्छन् ।

महिलासँगका प्रसंग अनेक रूपमा जोडिन्छ । महिलाको कपालको रंगदेखि खुट्टाको नङसम्मका विषय दर्शक हँसाउने माध्यम बन्छन् । साथै महिलाको अनुहार, चालडाल, लवाइखवाइ र शारीरिक अंगको प्रसंग जोडेर दर्शक हँसाउन बल गरिन्छ । गाईजात्रा महोत्सवमा पनि यस्तै प्रयास भए । साथै थुप्रै हास्य प्रस्तुतिमा महिला व्यंग्यका पात्र बन्दै आएका छन् ।

हास्यव्यंग्यमा सेन्सरसिप नहुँदा दर्शक हँसाउँदा महिलाको अपमान भइरहेको हास्यकलाकार जितु नेपाल (मुन्द्रे) बताउँछन् । फिल्म तथा टेलिसिरियलमा यस्ता विषयमा रोक लगाइए पनि सार्वजनिक हास्य कार्यक्रममा यस्तो प्रस्तुति नरोकिएको उनको भनाइ छ । ‘सुरुसुरुमा त मैले पनि नजान्दा यस्तै कुरामा व्यंग्य गर्थें’, जितुले भने, ‘आज दसौं वर्ष भयो मैले आफ्नो जिम्मेवारी बुझेर यो सब गर्न छाडेको छु ।’

महिलाको अंगमाथि सीधै व्यंग्य गर्नु उचित नभएको हास्य कलाकार पल्पसा डंगोल (चम्सुरी) को भनाइ छ । ‘तर सांकेतिक रूपमा हँसाउने प्रचलन पहिलेदेखि नै चलिआएको छ’, उनले भनिन्, ‘मैले गर्ने व्यंग्यमा पुरुषसरह महिला पनि सक्षम छन् भन्ने विषय उठाएकी छु ।’ उनको भनाइ छ, ‘परिवारमा बसेर हेर्न मिल्ने अभिनयमा बढी ध्यान दिन्छु ।’ महिलाबिना कुनै पनि प्रस्तुति सम्भव नभएको बताउने पल्पसा भन्छिन्, ‘निर्देशकलाई स्क्रिप्ट सच्याउन कर गर्दिनँ, कहिलेकाहीँ सुझाव दिने गरेकी छु ।’

जितु भने महिला कलाकार आफैं चुप रहँदा यो विषय दोहोरिएको बताउँछन् । ‘यस्तो विषयमा आवाज उठाएको खासै देख्दिनँ’, उनी भन्छन्, ‘महिला कलाकार नै भनेको भन्दा बढी गर्न तयार हुन्छन् ।’ महिला आफैं सचेत भए कसैले जबर्जस्ती गर्न नसक्ने उनी बताउँछन् ।

जिरे खुर्सानी टेलिसिरियलका लेखक सन्तोष खनालको भने अलि भिन्न विचार छ । शारीरिक हाउभाउ र स्वस्थ संवादको माध्यमबाट हँसाउनुपर्ने भए पनि नेपालमा त्यसको कमी छ । नेपाली दर्शकको हास्य चेत पनि कमजोर रहेको उनी बताउँछन् । ‘उच्चस्तरको हास्य प्रस्तुतिमा दर्शक खुलेर हाँस्न सक्दैनन्’, सन्तोष भन्छन्, ‘त्यसैले दर्शक हँसाउनकै निम्ति फितलो व्यंग्य गरिन्छ ।’

पछिल्लो समय नेपाली फिल्मामा कमेडी जनरा फस्टाएको छ । तीतोसत्य, जिरेखुर्सानी, भद्रगोल, महजोडीका हास्य टेलिशृंखला दर्शकले औधी रुचाए । अहिले कमेडी जनराले फिल्म उद्योगमा पनि आफ्नो प्रभाव जमाउन सक्षम भएको छ । विशेष समारोह, कार्यक्रम र चाडपर्वमा दर्शक हसाउन प्रहसन पनि प्रस्तुत हुँदै आएका छन् ।

हास्यकलाकार तथा निर्देशक दीपा श्री निरौलाका अनुसार ह्युमर जेमा छ कलाकारले त्यही विषयमा हँसाउने कोसिस गर्छ । त्यसलाई कसरी प्रस्तुत गर्ने भन्ने विषय मात्र फरक भएको उनको भनाइ छ । दर्शक हँसाउने काम त्यति सजिलो नभएको बताउँदै दीपा श्री भन्छिन्, ‘अहिले हास्यव्यंग्य क्षेत्रमा महिलाको आगमन निकै कम छ ।’ जो बिक्छ त्यही टिक्छ भन्ने सोचले पनि नयाँ कलाकार खासै नभित्रिएको उनको बुझाइ छ । दर्शक हँसाउन सक्ने क्षमता भगवान्ले दिएको आशीर्वाद ठान्ने दीपा श्रीका अनुसार जबर्जस्ती हँसाउनेभन्दा पनि हास्यव्यंग्य आफैं लेख्न सक्नेले मात्र दर्शकलाई स्वतःस्फुर्त हँसाउन सक्छ ।

Source annapurnapost

Share