मुस्ताङमा आन्तरिक पर्यटकको घुइँचो बढ्याे (तस्बिरसहित)

मुस्ताङमा आन्तरिक पर्यटकको घुइँचो बढ्याे (तस्बिरसहित)

जोमसोम : दसैं सकिनै लाग्दा मुस्ताङमा आन्तरिक पर्यटकको ओइरो बढेको छ । पर्यटकको आवागमन बढेपछि घाँसा देखि लोमान्थाङ सम्मका होटल तथा लज भरिभराउ छन् ।

मुस्ताङ उद्योग वाणिज्य संघका अध्यक्ष खगेन्द्र तुलाचनका अनुसार मुस्ताङका २ सय ८० वटा होटल तथा लजमध्ये अधिकांश होटल हरेक रात भरिभराउ छन् । पोखरा–जोमसोम हवाई र बेनी–जोमसोम सडक मार्ग भएर दैनिक तीन हजार जना भन्दा बढी पर्यटक मुस्ताङ भित्रीएको तथ्यांक जिल्ला प्रहरी कार्यालयले दिएको छ ।

प्रहरी नायव उपरीक्षक महेन्द्र खड्काका अनुसार आइतबार ६ सय २४ गाडी र त्यतिकै संख्यामा मोटरसाईकलबाट तीन हजार २ सय पर्यटक मुस्ताङ भित्रिएका थिए ।असोज–कात्तिक र फागुन–चैत–बैशाख महिना मुस्ताङ भ्रमणका लागि उपयुक्त मौसम मानिन्छ ।

सडक, यातायातको सुविधा, छुट्टी र अनुकुल मौसमका कारण स्वदेशी पर्यटकको चहलपहल बढेको तुलाचनको अनुमान छ । माटोको सहर लोमान्थाङ, तिब्बती र थकाली कला संस्कृति, मुक्तिनाथ, ठिनी, धुम्बा ताल, स्याउ बारी, कागबेनी, दामोदरकुण्ड र फरक भू–बनोट अवलोकनका लागि मुस्ताङ प्रसिद्ध छ ।

आन्तरिक पर्यटकको तथ्याङ्क सङ्कलन नगरे पनि बाह्य पर्यटकभन्दा दोब्बर आउने गरेको अनुमान स्थानीय व्यवसायीको छ । पछिल्लो समय मुस्ताङमा बाह्य पर्यटकको तुलनामा आन्तरिक पर्यटकको चहलपहल बढी हुने गरेको एक्याप जोमसोमका प्रमुख तुलसी दाहालले बताए ।

Source annapurnapost

Share